Bu gün Aprel döyüşləri şəhidi Raquf Orucovun mövlud günüdür. Onun 50 yaşı tamam olacaqdır.
Şəhidimiz Raquf Orucov 12 iyul 1972-ci ildə anadan olub. Qarabağ müharibəsi başlayanda, Raquf Özbəkistanda əsgərlikdə olub. Lakin o, qaçaraq vətəninə gəlir və döyüşlərdə iştirak edir. Döyüşlərdə fərqləndiyinə görə zabit olması üçün Ali hərbi məktəbə göndərilir.
Təhsilini bitirən kimi, leytenant rütbəsi alır və Murova kəşfiyyat xidmətinin bölük komandiri təyin edilir. Raquf Orucov Murovda işlədiyi müddət ərzində 40-dan artıq irimiqyaslı kəşfiyyat əməliyyatı keçirir.
Aprel döyüşləri Xüsusi təyinatlıların komandiri, polkovnik-leytenant Orucov üçün sonuncu döyüş oldu. O, 43 yaşında şəhidlik zirvəsinə ucalıb.
Kəşfiyyatçı Sumqayıt şəhəri, 14-cü məhəllədən son mənzilə yola salınıb. Onun Sumqayıtın Şəhidlər Xiyabanında dəfni ən izdihamlı dəfn mərasimlərindən biri idi.
Polkovnik-leytenant ölümündən sonra “İgidliyə görə” medalı ilə təltif edilib.
