Sumqayıtçaya bir neçə gündür ki, sarı kisələrə yığılmış toyuq cəsədləri atılır. Ətrafı üfunət qoxusu bürüyüb. Sumqayıt24 bu haqda bu gün, 26 aprel tarixində ATV-yə istinadən xəbər verir.
Bildirilir ki, sözügedən problem bir tərəfdən çayı və Xəzər dənizini çirkləndirir, digər tərəfdən isə sahibsiz itlərin çoxalmasına səbəb olur.
Məsələni araşdırmaq üçün, əraziyə 4 saylı Ekologiya və Təbii Sərvətlər Şöbəsinin əməkdaşları gəlib. Onlar quşların cəsədlərinə baxış keçirib, fotolarını çəkiblər. Bildirilib ki, yekun nəticədən sonra məsələyə hüquqi qiymət veriləcək.
Yaxınlıqda quşçuluq təsərrüfatı olsa da, özünü müəssisənin sahibi kimi təqdim edən şəxs cəsədlərin onlar tərəfindən çaya atıldığını inkar edib. Halbuki, həmin müəssisədə də çaya atılmış sarı kisələrdən istifadə olunur.
