Sumqayıtda keçmiş peşə məktəbinin binasında hər gecə narkomanlar yığışır. Bu barədə Sumqayıt24-ə sakinlər məlumat verib.
Söhbət 35 saylı keçmiş texniki peşə məktəbinin Koroğlu prospektində yerləşən binasından gedir. Burada məskunlaşan məcburi köçkünlərin əksəriyyəti 3 il öncə köçürülsə də, bir neçə ailə hələ də yaşamaqdadır.
Onları narahat edən məsələlərdən biri yuxarı mərtəbələrdə narkotik aludəçilərinin “yuva” qurması, digəri isə antisanitariyadır. Belə ki, binanın hər bir tinində istifadə edilmiş çox sayda şprisə rast gəlmək olar.
“Onlar indi də orada yatıblar. Uşaq var, qız-gəlin var. Qorxduğumuz odur ki, onlara zərər yetirərlər. Aidiyyəti qurumlardan buna xüsusi diqqət yetirmələrini istəyirik”, - sakinlər əlavə ediblər.
