Pirşağı-Xırdalan-Novxanı-M4 avtomobil yolunda yerüstü piyada keçidi inşa edilir.
Sumqayit24.az xəbər verir ki, bu barədə Azərbaycan Avtomobil Yolları Dövlət Agentliyi (AAYDA) məlumat yayıb.
Bildirilib ki, yeni keçid sözügedən yolun 19.5-ci km-liyində tikilir. İki giriş-çıxışdan ibarət olan tikilinin ümumi uzunluğu 59.8 metr, aşırım hissəsinin eni 4, pilləkənlərin eni 2 metrdir.
Yol səviyyəsindən hündürlüyü 5.5 metr olan keçid üstüaçıq dəmir-beton konstruksiyalıdır. Keçiddə 2 metr enində oval tipli piyada pandusları da quraşdırılacaq.
Layihə çərçivəsində piyada keçidinin sol və sağ dayaqlarının təməlləri tam şəkildə tikilib, hazırda keçidin sağ dayaqlarının sütunlarının tikintisi işləri aparılır.
Yeni yerüstü piyada keçidi inşa edilən ərazidə piyadaların avtomobil yolunu rahat və təhlükəsiz şəraitdə keçməsini təmin edəcək.
