Novxanıda bir neçə ictimai iaşə obyektində yaranan məişət səs-küyünə qarşı profilaktik tədbir keçirilib.
Sumqayit24.az xəbər verir ki, bu barədə Daxili İşlər Nazirliyi (DİN) məlumat yayıb.
Reyd vətəndaşlardan daxil olan çoxsaylı şikayətlər əsasında polis əməkdaşları, həmçinin Ekologiya və Təbii Sərvətlər Nazirliyinin mütəxəssisləri tərəfindən həyata keçirilib.
Nəticədə bir neçə obyektin gecə yarısından sonra məişət səs-küyü ilə bağlı mövcud qanunvericiliyin tələblərini pozduğu aşkar edilib. Həmin ictimai iaşə obyektlərində yüksək səsli musiqi dayandırılıb, obyekt sahibləri ilə profilaktik söhbətlər aparılıb. Həmin şəxslər barəsində inzibati protokollar tərtib olunaraq cərimə tətbiq edilib. Bu cür halların təkrarlandığı təqdirdə onlara qarşı daha sərt tədbirlərin görüləcəyi obyekt sahiblərinin diqqətinə çatdırılıb.
