STP şirkətlər qrupu ödənişli “Sabahın Gücü” İnkişaf Proqramına start verir. Sumqayıt24 bu haqda 22 dekabr tarixində xəbər verir.
Məqsəd istehsal mühəndisliyi, texniki peşələr istiqamətində xüsusi potensialı olan gənc kadrların müəyyən edilməsi və yetişdirilməsinə dəstək olmaqdır. Proqram STP-nin törəmə müəssisələrində, xarici şirkətlərin akademik mərkəzlərində, yerli və xarici ekspertlərin mentorluğu ilə nəzəri və praktiki biliklərin verilməsi, fərdi bacarıqların, sosial məsuliyyətin inkişafı, ən yaxşı təcrübələrin mübadiləsi metodu ilə 6-12 aylıq müddətləri əhatə edəcək. Fərqlənən mütəxəssislər STP şirkətlər qrupuna daxil olan şirkətlərdə işlə təmin ediləcəklər.
“Sabahın Gücü” İnkişaf Proqramının imkanlarından faydalanaraq gələcək karyerasında ilk addımı atmaq istəyən, müvafiq sahələrdə bilik və bacarıqlara malik, özünə güvənən gənc kadrlar https://stpcareer.com/ portalında qeydiyyatdan keçə bilərlər.
Xüsusi istedadların axtarıldığı peşə və ixtisaslarla bağlı daha ətraflı məlumatları stpcareer.com və sosial şəbəkə səhifələrindən əldə etmək olar.
