Bir çox ofis əməkdaşı günün böyük hissəsini oturaq vəziyyətdə keçirir. Bu isə, hətta onlar müntəzəm olaraq idman zalına getsələr belə, sağlamlığa mənfi təsir göstərə bilər.
Bu barədə rusiyalı kardioloq, “Sağlam olmaq vərdişi. Hipertoniyanın, infarktın və insultun qarşısını necə almaq olar” kitabının müəllifi Natalya Qavrilyuk kp.ru-ya açıqlamasında danışıb.
Onun sözlərinə görə, iş vaxtı ərzində edilən sadə hərəkətlər ürək və damar sağlamlığını qorumaqda mühüm rol oynayır:
“Məşqdən kənar aktivlik – bu, xüsusi idman məşqləri xaricində edilən bütün fiziki fəaliyyətlərin cəmidir. Məsələn, evdə gəzinti, bədənin vəziyyətinin dəyişdirilməsi və ya qısa məsafələrdə yerimək kimi. İş zamanı hər 30–60 dəqiqədən bir ayağa qalxmaq çox vacibdir”.
Mütəxəssis əlavə edib ki, cəmi bir dəqiqəlik hərəkət belə faydalıdır – istər ayaqları hərəkət etdirmək, istər ofis daxilində azacıq gəzmək. Bu cür sadə vərdişlər orqanizmi aktiv saxlayır və uzunmüddətli oturaq işin mənfi təsirini azaldır.
Qavrilyuk həmçinin qeyd edib ki, mümkün olduqda ayaq üstə işləmək də sağlamlıq üçün faydalıdır:
“İndi ofislər üçün ayaq üstə işləməyə imkan verən xüsusi masalar var. Gündə cəmi 30 dəqiqə ayaq üstə işləmək belə fiziki vəziyyətinizi yaxşılaşdıra bilər”.
Kardioloq həmçinin bu hərəkətləri gündəlik gəzintilər və yüngül məşqlərlə birləşdirməyi tövsiyə edib. Onun fikrincə, parkda gəzintilər və sadə gimnastika orqanizmin ümumi vəziyyətinə müsbət təsir göstərir.
