Demək olar ki, Sumqayıtda yaşayan hər kəs "Sevgi körpüsü”nü tanıyır.
Xüsusən də gənclər arasında belə ad qazanan körpü "Nəsimi" adına Mədəniyyət və İstirahət Parkının ərazisində yerləşir. Körpü sakinlərin ən çox şəkil çəkdirdiyi yerlərdən biridir. Bura həm də cütlüklərin görüş yeridir. Sevənlər körpünün dəmir konstruksiyalarında adlarını yazaraq bir-birlərinə qarşı olan məhəbbətlərini ifadə edirlər.
Burada ürək şəklində maraqlı metal konstruksiya da quraşdırılıb. Sevgililər qıfıllarını həmin ürəyə bağlayırlar. Bura artıq 100-dən artıq qıfıl vurulub. Bu məkanda təkcə gənclərin deyil, yaşlı nəslin də xatirələri olub. Hələ keçmiş SSRİ dövründən bu körpüdə insanlar xoş günlərini qeyd ediblər. Belə bir ənənə sevginin əbədiliyini simvolizə edir. Açarı itən qıfılı heç kimin aça bilmədiyi kimi, bu sevgililəri də heç kimin ayıra bilməyəcəyinə inanc yaranıb.
