Sumqayıtda "Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə olunmasının təşkili" mövzusunda məşqlər davam edir. Sumqayıt24 bu haqda 8 mart tarixində Sumqayıt Tibb Mərkəzinə (STM) istinadən xəbər verir.
Növbəti təlim Perinatal Mərkəzdə təşkil olunub. Mərkəzin baş həkimi Təranə Rəcəbli şərti siqnalı verərək 3 siqnal üzrə həyata keçirilən məşqin başlanmasını elan edib:
- İlk siqnalda zəlzələ nəticəsində tibb ocağında dağıntı və tələfatın olduğu bildirilib;
- İkinci siqnalda zəlzələnin təsirindən Etilen-polietilen zavodunda 10 tonluq xlor çəninin dağılaraq ətrafa yayıldığı və nəticədə kimyəvi zəhərlənmələr olduğu qeyd edilib:
- Üçüncü siqnal əsasında həyata keçirilən mülki müdafiə məşqində vurğulanıb ki, zəlzələ nəticəsində mərkəzin elektrik xətlərində yaranmış qısaqapanmadan yanğın baş verib.
Mülki müdafiə qərargahının üzvləri hər 3 halda təhlükələrin aradan qaldırılması istiqamətində həyata keçirilən tədbirləri iştirakçıların nəzərinə çatdırıblar. Mərkəzin həkim pediatrı Leyla Nuriyeva isə xlor məhlulunun törətdiyi fəsadlar və ondan qorunmağın yollarından danışıb.
