Sumqayıtda səkilərin üzərində olan obyektlər sökülür. Sumqayıt24 bu barədə 25 avqust tarixində BakuTV-yə istinadən xəbər verir.
Bu istiqamətdə işlərə Məzahir Abdullayev küçəsindən başlanıb və deyilənə görə, bütün şəhəri əhatə edəcək.
Sökülən obyektlərin sahibləri bildirir ki, onlara yazılı sürətdə heç bir qərar göstərilməyib: “10 ildir ki obyekt işlədirəm. Birdən birə, gecə saatlarında bir nəfər gəldi dedi ki, sökəcəyik buranı. Camaat 5-10 manat sərmayə qoyub çörək üçün. Belə olmaz”.
Digər sahibkar əlavə edib ki, həmin ərazidə ümumiyyətlə piyada səkisi yoxdur. Bu səbəbdən tikinti işləri aparanda icazə alınmayıb.
Memarlıq və şəhərsalma idarəsinin əməkdaşı Əli Vəlizadə məsələyə aydınlıq gətirib: “Sahibkarlara dəfələrlə yazılı və şifahi formada müraciət edilib. Onlar buna məhəl qoymayıblar. Ona görə də, bu gün, biz gəlmişik obyektlərin səkiyə çıxan hissəsini sökməyə. Nə qədər belə obyekt varsa, hamısı söküləcək”.
Sahibkarlara dəymiş ziyanın ödənilib-ödənilməyəcəyi barədə açıqlama verilməyib.
