Bakı-Sumqayıt şosesində yolu bağlayan sürücü həbs edilib. Sumqayıt24 bu haqda 14 oktyabr tarixində Qaynarinfo.az-a istinadən xəbər verir.
Məlumata görə, 42 yaşlı Zaur Camalov (ad-soyad şərti) idarə etdiyi "Mercedes Benz” avtomobilinin arxa nömrə nişanının mövcud standartlara cavab verməməsi səbəbindən DYP əməkdaşları tərəfindən saxlanılıb.
O, cərimədən narazı qaldığı üçün polisləri videoya çəkib. Onlara qarşı kobud şəkildə öz narazılığını bildirərək, yolun hərəkət istiqamətində dayanmaqla tıxac yaradıb.
Bundan sonra Zaur Camalov polis əməkdaşları tərəfindən saxlanılıb, Binəqədi rayon Polis İdarəsinin 6-cı Polis Bölməsinə aparılıb və barəsində İnzibati Xətlar Məcəlləsinin 535.1-ci maddəsi ilə inzibat xəta protokolu tərtib edilib.
Məhkəmənin qərarı ilə Zaur Camalov 8 gün müddətinə inzibati həbs olunub.
