Beynəlxalq Qızıl Xaç və Qızıl Aypara Cəmiyyəti Federasiyasının İcma ilə əlaqələr və hesabatlılıq üzrə departamentinin Cənubi Qafqaz üzrə nümayəndəsi Eva Erlaç QAC Sumqayıt şəhər bölməsində olub. Bu barədə 25 avqust tarixində Sumqayıt24 xəbər verir.
Onu İcma ilə əlaqələr və hesabatlılıq üzrə məsul şəxs Kamila Rüstəmova və Rəqəmsal və kommunikasiya üzrə mütəxəssis Vüsal Səfərli müşayiət ediblər. Bölmə sədri Mətanət Məhərrəmova foto-slayd vasitəsilə qonaqları bölmənin fəaliyyətləri barədə məlumatlandırıb.
Sonra nümayəndə heyəti Avtomobil məktəbinin yataqxanasında məskunlaşan icma üzvləri ilə görüşüb. Günün 2-ci yarısı isə bölmə təlimatçısı Lalə Cəlilzadə İcmalarla görülən işlərin hesabatını foto-slayd əsasında təqdim edərək qonaqları maraqlandıran sualları cavablandırıb.
Bundan əlavə, Kamilla Rüstəmova bölmə könüllülərinə “Güvən və inam” mövzusunda iki saatlıq seminar keçirib. Həmçinin onlar ilə praktiki məşğələ təşkil olunub.
