Sumqayıt şəhərində kişi qeyri-rəsmi münasibətdə olduğu qadına xəsarət yetirib.
Teleqraf.az-ın əldə etdiyi məlumata görə, hadisə ötən ilin dekabrın 22-də 3-cü mikrorayon ərazisində baş verib.
Belə ki, 1990-cı il təvəllüdlü Mübariz həmin gün saat 18:00-da qeyri-rəsmi münasibətdə olduğu Aygün (adlar şərti verilib – red.) ilə birlikdə yaşadıqları binanın ikinci mərtəbəsində qısqanclıq zəminində mübahisə edib.
Baş verən mübahisə zamanı o, Aygünün sol çiyin nahiyəsinə yumruq vurub. Ona müxtəlif dərəcəli bədən xəsarətləri yetirib.
Mübarizin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İzahat verən Mübariz özünü ittiham üzrə təqsirli bilib. O, ifadəsində göstərib ki, Aygünlə bir ildir qeyri-rəsmi münasibətdədir, birlikdə kirayədə yaşayır:
"Aygün ilə bir neçə dəfə mübahisələrim olub. Bu mübahisələrimiz qısqanclıq zəminində baş verib. Sonuncu dəfə yaşadığımız mənzildən getdiyim vaxt Aygünü binanın 2-ci mərtəbəsində gördüm. Ondan haradan gəldiyini soruşduqda, cavab vermədi. Saymazlığı məni əsəbləşdirdi. Onun sol çiyin nahiyyəsindən bir dəfə yumruq zərbəsi vurdum".
Təqsirləndirilən şəxs ifadəsində törətdiyi əməldən peşman olduğunu, zərərçəkmiş şəxslə barışdığını deyib.
Aygünün sözlərinə görə, məlum hadisə vaxtı binanın 2-ci mərtəbəsində Mübariz ilə rastlaşan vaxt nənəsinin evindən gəlib:
"Mübariz məndən haradan gəldiyimi soruşdu. Ondan küsülü olduğum üçün cavab vermədim və sakit şəkildə evə qalxmağa çalışdım. Bu zaman Mübariz sol çiyin nahiyəmə yumruqla vuraraq mənə xəsarət yetirdi".
Bu cinayət işinə Sumqayıt Şəhər Məhkəməsində baxılıb.
Məhkəmədə məlum olub ki, təqsirləndirilən şəxs zərərçəkənlə barışıq əldə edib. Bu səbəbdən də zərərçəkmiş ona qarşı şikayətini geri götürüb.
Məhkəmənin hökmü ilə Cinayət Məcəlləsinin 73.2-ci maddəsinə əsasən təqsirləndirilən şəxsin barəsində olan cinayət təqibinə xitam verilib. O, cinayət məsuliyyətindən azad edilib.
