Bu gün şəhidimiz Murad Məmmədovun mövlud günüdür. O, 7 dekabr 1995-ci ildə Sumqayıt şəhərində anadan olub.
Murad ibtidai təhsilini 23 nömrəli məktəbdə alıb, 10-cu sinfə qədər Təbiət Elmləri Təmayüllü Gimnaziyada, məzun sinfini isə 22 nömrəli məktəbdə oxuyub. Ali təhsilini Azərbaycan Texniki Universitetinin Elektroenergetika mühəndisliyi fakültəsində alıb. Bu müddət ərzində o, cüdo ilə ciddi məşğul olub.
Hərbi xidməti başa vurduqdan sonra “Azərişıq”da mühəndis vəzifəsində işə başlayıb. 1 oktyabr 2020-ci ildə qardaşının Vətən müharibəsində olmasına baxmayaraq, Murad da könüllü olaraq ordu sıralarına qatılıb. Döyüşlər zamanı şücaət göstərib və 25 oktyabrda Qubadlının azad olunması uğrunda gedən döyüşlərdə şəhadətə ucalıb. Elə həmin gün Qubadlı şəhəri işğaldan azad olunub.
Prezidentin sərəncamı ilə Murad Məmmədov ölümündən sonra "Vətən uğrunda", "Vətən müharibəsi iştirakçısı" və "Qubadlının azad olunmasına görə" medalları ilə təltif edilib.
