Vətən müharibəsi şəhidi, mayor Taleh Kərimovun doğum günüdür.
Taleh Adil oğlu Kərimov 6 mart 1985-ci ildə Sumqayıt şəhərində anadan olub. O, əvvəl Corat qəsəbəsində 7 nömrəli məktəbdə, daha sonra Məhəmməd Füzuli adına "İstedad" liseyində oxuyub. 2003–2007-ci illərdə Heydər Əliyev adına Azərbaycan Ali Hərbi Məktəbində "Kəşfiyyatçı" ixtisası üzrə ali hərbi təhsil alıb.
2007-ci ildən etibarən Azərbaycan Silahlı Qüvvələrində xidmətə başlayıb. Müxtəlif illərdə kəşfiyyat bölmələrində mühüm vəzifələrdə çalışıb, o cümlədən kəşfiyyat taqım komandiri, kəşfiyyat bölməsinin rəisi və 4-cü Ordu Korpusunun kəşfiyyat şöbəsində rəis müavini olub. Son olaraq Kəşfiyyat Baş İdarəsində xidmət edirdi.
Azərbaycan Ordusunun mayoru Taleh Kərimov 2020-ci il Vətən müharibəsi zamanı Füzuli, Cəbrayıl və Qubadlı istiqamətlərində gedən döyüşlərdə iştirak edib. O, 30 oktyabr 2020-ci ildə Qubadlı uğrunda döyüşlərdə qəhrəmancasına şəhid olub. Şəhidimiz Sumqayıt Şəhidlər Xiyabanında dəfn olunub.
Qəhrəmanlığına görə Taleh Kərimov ölümündən sonra "Qarabağ" ordeni, həmçinin "Vətən uğrunda", "Qubadlının azad olunmasına görə", "Cəbrayılın azad olunmasına görə" və "Füzulinin azad olunmasına görə" medalları ilə təltif edilib.
