Sumqayıtda abituriyentlər üçün növbəti təbliğat görüşləri keçirilib.
Sumqayit24.az xəbər verir ki, Qarabağ Universitetinin Tibb və sağlamlıq elmləri fakültəsinin rəhbər heyətinin iştirakı ilə baş tutan görüşlərdə yüksək bal toplayan abituriyentlər iştirak ediblər.
Çıxış edənlər bildiriblər ki, qarşıdan gələn tədris ilindən etibarən Qarabağ Universitetində Tibb və sağlamlıq elmləri fakültəsinin fəaliyyəti başlayacaq. Fakültədə beynəlxalq təcrübəyə əsaslanan, kompetensiya yönümlü təhsil modeli üzrə 6 illik Müalicə işi (Tibb) və 4 illik Tibb bacısı (və ya qardaşı) proqramları həyata keçiriləcək.
Nümayəndələr, həmçinin fakültədə fəaliyyət göstərəcək xarici təcrübəyə malik professor-müəllim heyəti, pasiyent mərkəzli yanaşma, müxtəlif sahələrin inteqrasiyasına əsaslanan multidissiplinar təhsil modeli, ictimai sağlamlıq və qidalanma sahələri ilə inteqrasiya, innovativ öyrətmə metodları, son nəsil tibbi texnologiyalar və simulyasiya mərkəzinin fəaliyyəti barədə də ətraflı məlumat veriblər.
Görüşün sonunda abituriyentlərə fakültə barədə geniş məlumatları əhatə edən təqdimatlar və çap materialları təqdim olunub.
