Özünü qazi kimi təqdim edən şəxs kirayə qaldığı evi satışa çıxarıb. Sumqayıt24 bu haqda 20 dekabr tarixində Lent.az-a istinadən xəbər verir.
Qeyri-adi dələduzluq hadisəsi Sumqayıtda, “Stansiya Sumqayıt” adlanan ərazidə baş verib. Xaçmaz sakini Əfqan Məmmədov şəhərimizin sakini Akif Bayramovun evində kirayədə qalıb. Bu zaman o, evdə olan əşyaların hamısını satıb.
“Təxminən 40-45 yaşlarında olan kişi özünü Vətən müharibəsi qazisi kimi təqdim edib evimdə kirayə qalırdı. Deyirdi ki, Suqovuşanda döyüşüb, iki medal alıb. Biz də qazi olduğunu dediyi üçün rahatlıqla evimizi kirayəyə verdik. Yanında 25 yaşlarında bir qız da vardı. Qazi olduğuna inanıb pul da almadım. Dekabrın ortalarında Əfqan həyətdəki köhnə “Zaporojets” markalı avtomobili kəsib-doğrayaraq satıb. Dəmir kanalizasiya borularını, pəncərələrin karnizini, hamamdakı əşyaları satıb. Evimi də satışa qoyub. O, özünü ev sahibi kimi təqdim edərək alıcıdan 1700 manat beh də alıb. İndi onunla əlaqə saxlamaq mümkün deyil, yoxa çıxıb”, - deyə Bayramov bildirib.
Zərərçəkmiş başına gələnlərlə bağlı polisə üz tutub. Ona bildirilib ki, Əfqan bundan əvvəl 2-3 dəfə də anoloji əməllər edib.
Araşdırmalar aparılır.
