Qızıl tapmaq məqsədilə tarixi abidəni sökmək istəyən Sumqayıt sakinləri saxlanılıblar. Sumqayıt24 bu barədə 27 oktyabr tarixində Apa.az-a istinadən xəbər verir.
Hadisə Daşkəsən rayonunun Aran Zəylik kəndi ərazisində yerləşən 7-9-cu əsrlərdə inşa olunan Alban Məbədində qeydə alınıb. Bir neçə şəxsin qanunsuz olaraq qızıl axtarması və məbədə ziyan vurulması ilə bağlı RPŞ-yə məlumat daxil olub.
Aparılan araşdırmalar zamanı məlum olub ki, qabaqcadan planlaşdıraraq sözügedən əraziyə gəlmiş Sumqayıt şəhər sakinləri Namiq Əliyev, Əliağa Əhmədov, Şirvan şəhər sakini Eynur Səmədov, Bakı şəhər sakini Ülfət Niftalıyev və Quba rayon sakini Taleh Şirinov müxtəlif elektrik avadanlıqları və alətlərin köməyi ilə məbədin ərazisində qızıl axtarışlarına başlayıblar.
Həmin şəxslər maddi sübutlarla birlikdə saxlanılaraq istintaqa təhvil veriliblər. Faktla bağlı araşdırmalar davam etdirilir.
