Sumqayıtda 6 uşağın dəm qazından zəhərlənməsi ilə bağlı hadisə ictimaiyyətin diqqətində qalmaqda davam edir.
Zərərçəkən uşaqların atası Kamil Cəbrayılov məsələ ilə bağlı APA TV-yə açıqlama verib. O bildirib ki, ailədə ümumilikdə 9 uşaq olsa da, onlardan biri başqa ailəyə verilib.
"Uşağın birini uşağı olmayan birinə pay vermişik. Bizimlə yaşamır. Burada rəsmi olaraq 8 uşaq var", - deyə o qeyd edib.
Daxili İşlər Nazirliyinin (DİN) Mətbuat Xidmətinin əməkdaşı Lumu İsrəfilli Sumqayit24.az-ın sorğusuna cavab olaraq bildirib ki, səsləndirilən həmin iddialar nəzarətə götürülüb və araşdırma predmetidir:
"Məsələ ilə bağlı aidiyyəti dövlət qurumları ilə birgə müvafiq yoxlamalar aparılır. Araşdırmanın nəticəsindən asılı olaraq qanunvericiliyə uyğun tədbirlərin görülməsi təmin ediləcəkdir".
