Ceyranbatan qəsəbəsinin sakinləri piyada keçidlərinin sayının artırılmasını və sökülən avtobus dayanacağının bərpa olunmasını istəyir.
Müraciətdə qeyd olunub ki, Bakı-Rusiya sərhədi magistral yolu Ceyranbatan qəsəbəsinin mərkəzindən keçir. Bundan əlavə, qəsəbənin Bakı və Sumqayıt kimi ölkənin iri şəhərləri arasında yerləşməsi səbəbindən yolda nəqliyyatın intensiv hərəkəti müşahidə olunur.
Sakinlərin sözlərinə görə, ərazidəki mövcud bir piyada keçidi qəsəbənin böyüklüyü və əhalinin ehtiyacları baxımından kifayət etmir. Onlar yolda tez-tez qəzaların baş verdiyini və bunun piyadalar üçün təhlükə yaratdığını iddia edirlər.
Müraciətdə, həmçinin qəsəbənin Sumqayıt istiqamətində yerləşən avtobus dayanacağının ötən həftə söküldüyü bildirilib.
"Bu camaat yayın istisində, yağışda, qarda nə etməlidir?" - deyə şikayətçilər müraciətdə qeyd ediblər.
Sakinlər magistral yolda piyada keçidinin sayının artırılmasını və sökülən dayanacağın yerində yenisinin quraşdırılmasını xahiş edirlər.
Mənbə: Yenixeberorg
