Sumqayıt şəhər 31 nömrəli tam orta məktəbdə Vətən müharibəsinin şəhidi kapitan Samir İslamovun adı övladının oxuduğu sinif otağına verilib. Bu haqda bu gün, 16 fevral tarixində məktəb öz Facebook hesabında məlumat yayıb.
Tədbirdə şəhidin ailəsi, yaxınları və məktəbin kollektivi iştirak ediblər. Burada 1-ci və 3-cü sinif şagirdləri vətənpərvərlik ruhunda şeirlər səsləndiriblər.
Samir İslamov 5 fevral 1983-cü ildə Sumqayıt şəhərində anadan olub. Kapitan Vətən müharibəsi zamanı Tərtər rayonunun Talış qəsəbəsinin azadlığı uğrunda gedən döyüşlərdə savaşıb. Samir İslamov 9 oktyabr tarixində Talış döyüşləri zamanı şəhid olub. O, Sumqayıt şəhəri Şəhidlər Xiyabanında dəfn olunub.
Şəhid Samir İslamov ölümündən sonra "Vətən uğrunda" və "Suqovuşanın azad olunmasına görə" medalları ilə təltif edilib.
