"Qəhvə uzun müddətdir milyonlarla insanın səhər ritualının bir hissəsinə çevrilib. Ancaq az adam bilir ki, ilk fincanı içmək üçün hansı vaxt daha uyğundur və sağlamlığa zərər vermədən nə qədər kofein qəbul etmək lazımdır".
Sumqayit24.az xəbər verir ki, bu barədə rusiyalı kardioloq Anastasiya Şerbak Gazeta.ru saytına müsahibəsində danışıb.
"Oyandıqdan sonra orqanizmdə kortizolun (gümrahlıq hormonu) səviyyəsi onsuz da kifayət qədər yüksək olur. Əgər bu vaxt qəhvə içilərsə, gümrahlıq effekti zəif olur, mədənin selikli qişasının qıcıqlanması riski isə artır. Qastroenteroloji tövsiyələrə əsasən, qəhvənin ilk fincanı üçün optimal vaxt yuxudan oyanandan 1.5-2 saat sonra - kortizol səviyyəsinin azaldığı və kofeinin daha effektiv təsir göstərdiyi zamandır", - deyə Şerbak bildirib.
Həkim vurğulayıb ki, acqarına içilən qəhvə mədə şirəsi ifrazını stimullaşdırır və bu da mədə yanmasına, qarının yuxarı hissəsində ağrılara səbəb olur. Zaman keçdikcə isə qastrit və ya mədə xorası riski arta bilər. Buna görə qəhvəni səhər yeməyi ilə və ya ən azı kiçik qəlyanaltı ilə birlikdə içmək məsləhətdir.
"Müasir məlumatlara görə, sağlam yetkin insan üçün təhlükəsiz gündəlik kofein dozası 400 mq-dır, birdəfəlik doza isə 200 mq-ı keçməməlidir. Misal üçün, bir fincan espresso (30 ml) 60-100 mq kofein, bir fincan çay (230 ml) təxminən 50 mq, enerji içkisi bankası (250 ml) isə 150 mq kofein ehtiva edə bilər", - deyə mütəxəssis qeyd edib.
Hamilə qadınlar üçün gündəlik norma 200 mq, uşaqlar üçün isə bədən çəkisinə görə hesablanır - 1 kq üçün təxminən 2,5-3 mq.
Şerbak, həmçinin gündə 450 mq-dan çox kofeinin müntəzəm qəbulu nəticəsində yuxusuzluq, əsəbilik, narahatlıq, ürək döyüntüsünün artması, qan təzyiqinin yüksəlməsi, mədə-bağırsaq pozğunluqları (ürəkbulanma, qusma, qarında ağrılar), orqanizmdən kalsiumun yuyulması kimi problemlərin yarana biləcəyini bildirib. Bu, zamanla sümüklərin, dişlərin və saçların vəziyyətinə təsir edir və kofein asılılığına səbəb ola bilər.
