Çinin Ninsya Tibb Universitetinin alimləri tərəfindən aparılan genişmiqyaslı metatəhlilin nəticələrinə görə, səhər yeməyindən imtina edən insanlarda piylənmə, yüksək qan təzyiqi (hipertoniya), qanda şəkərin artması və xolesterin pozuntuları ilə müşahidə olunan metabolik sindromun yaranma riski xeyli artır.
Sumqayit24.az xəbər verir ki, tədqiqatın nəticələri nüfuzlu “Nutrients” jurnalında dərc edilib.
Onminlərlə iştirakçını əhatə edən doqquz elmi araşdırmanın ümumi analizi göstərib ki, davamlı şəkildə səhər yeməyindən imtina edən şəxslərdə metabolik sindromun inkişaf ehtimalı 10–26% daha çoxdur. Xüsusilə belə insanlarda qarın hissəsində piylənmə (abdominal piylənmə) və qanda qlükozanın yüksəlməsi halları daha çox müşahidə olunub.
Mütəxəssislər bildiriblər ki, müntəzəm səhər yeməyi orqanizmin maddələr mübadiləsini balanslı saxlamağa kömək edir. Bu isə diabet və ürək-damar xəstəliklərinin qarşısını almaqda sadə, lakin təsirli bir üsul hesab olunur. Alimlərin qənaətinə görə, səhər yeməyindən imtina etmək zərərsiz vərdiş deyil, əksinə, uzunmüddətli xroniki xəstəliklər üçün potensial risk amilidir.
