Sumqayıt ərazisində sahibsiz itlər çoxalıb. Sumqayıt24 bu haqda bu gün, 13 aprel tarixində Bakupost.az-a istinadən xəbər verir.
Məlumata əsasən, mikrorayonlarda, parklarda, küçələrdə, ictimai yerlərdə itlər sürü halında gəzirlər və insanları qorxudurlar. Həmçinin, itlərin kütləvi hücumuna məruz qalanlar da var.
“Küçə itləri gecə vaxtı sürü halında daha təhlükəli və aqressiv olurlar. Buna görə Sumqayıtda gecə vaxtı çölə çıxmağı qəhrəmanlıq saymaq olar. Sumqayıtda il ərzində it dişləməsi çox baş verir. Bu məsələ yalnız ölüm faktı olduqda gündəmə gəlir. Bir neçə il əvvəl Sumqayıtda 10-cu mikrorayon ərazisində it dişləməsindən 20 gün sonra 5 yaşlı şəhər sakini Mikayılzadə Zeynəb Elçin qızı quduzluq nəticəsində vəfat edib. O, xəstəxanaya yerləşdirilsə də, xilas etmək mümkün olmayıb. Hücum edən it onu üz və alın nahiyəsindən dişləyib. Bundan başqa bir nəfər kişi də itlərin hücumuna məruz qaldığı üçün ölüb. Sumqayıtda insan həyatı, əsasən də azyaşlılar üçün təhlükə mənbəyinə çevrilən sahibsiz itlər zərərsizləşdirilməli, torlar vasitəsilə tutulub ərazidən uzaqlaşdırılmalı və sığınacaqlarlarda yerləşdirilməlidir”,- sakinlər bildirib.
