Sumqayıtda şəhid Emil İsgəndərovun doğum gününə həsr olunan tematik gecə keçirilib. Sumqayıt24 bu haqda 6 avqust tarixində Regional Mədəniyyət İdarəsinə istinadən xəbər verir.
Nəriman Nərimanov adına Mədəniyyət Mərkəzində “Dostluq” Mədəniyyət evinin təşkil etdiyi gecə “Şəhidlik ən uca addır” adını daşıyıb. Tədbirdə İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Tərlan Hacızadə, Cümə məscidinin axundu Hacı Rauf Sərdarov, Regional Mədəniyyət İdarəsinin əməkdaşı, “Şəhid Analarına Dəstək” İctimai Birliyinin sədri, şəhid Əbdülməcid Axundovun anası Ceyran Həsənova və yaxın qohumları iştirak ediblər.
Aparıcılar Daxili Qoşunların giziri Emil İsgəndərov haqqında ətraflı məlumat veriblər. Daha sonra isə videoçarx nümayiş olunub.
Tədbirin bədii hissəsində şəhidimizə həsr olunan səhnə canlandırılıb. “Qönçə” xor kollektivi və bədii özfəaliyyət kollektivinin ifasında vətənpərvərlik ruhunda mahnılar səsləndirilib.
Sonda Sumqayıt Regional Mədəniyyət İdarəsinin rəisi Rəşad Əliyevin adından Ceyran Həsənova şəhidin anası Tənzilə xanıma gül dəstəsi təqdim edib. [modula id="19678"]
