Sumqayıtda şəhid və qazilərin ailə üzvləri üçün kibertəhlükəsizlik sahəsində təlim keçiriləcək. Sumqayıt24 bu haqda 21 iyun tarixində Rəqəmsal İnkişaf və Nəqliyyat Nazirliyinə istinadən xəbər verir.
Görüş Elektron Təhlükəsizlik Xidməti tərəfindən “Kiber Smart Ol” layihəsi çərçivəsində təşkil olunacaq. Burada qeyd olunan kateqoriyaya aid 12-17 yaş arası şəxslər iştirak edə biləcək.
Onlara internetdən təhlükəsiz istifadə üçün əməl edilməsi vacib olan kibergigiyena qaydaları haqqında, internetdə qarşılaşa biləcəkləri təhlükələr, onlarla mübarizə üsulları, həmçinin İT ixtisasları və rəqəmsal bacarıqların inkişaf etdirilməsinə dair ətraflı məlumat veriləcək.
Qeyd edək ki, bu layihə Koreya Beynəlxalq Əməkdaşlıq Agentliyinin (KOICA) “CIAT paylaşımdır” proqramı üzrə qalib olub.
