Sumqayıtda “Ana südü ilə qidalandırmanın vacibliyi və üstünlükləri” adlı tədbir keçirilib. Bu barədə 9 avqust tarixində Tibb Mərkəzinə istinadən xəbər veririk.
Tədbir 3 nömrəli Ailə Sağlamlıq Mərkəzində baş tutub. Yığıncaqda TƏBİB-in məsul şəxsləri, BMT-nin Uşaq Fondunun (UNİCEF) Bakı ofisinin nümayəndələri, eləcə də Sumqayıt Tibb Mərkəzinin əməkdaşları iştirak ediblər.
Görüşdə çıxış edənlər mövzunun əhəmiyyətindən danışıblar. Bildirilib ki, yeni doğulmuşlar və körpələr üçün ən yaxşı qida ana südüdür. Ana südü lazımi miqdarda qida maddələrinə malikdir və asanlıqla həzm olunur. Vurğulanıb ki, 6 aydan sonra 2 yaşına qədər və ondan sonrakı müddətdə də əlavə qidalar da olmaqla yanaşı, ana südü ilə qidalandırma davam etdirilməlidir.
Analara və yeni doğulmuşlara tibbi xidmət göstərən müəssisələrin əməkdaşlarının qatıldığı tədbirdə müzakirələr aparılıb, iştirakçıları maraqlandıran suallar cavablandırılıb.
