Xəbər verdiyimiz kimi, Sumqayıt şəhərini Saray qəsəbəsi ilə birləşdirən körpüdə hazırda aparılan təmir işləri sürücülər üçün ciddi çətinliklər yaradır.
Xüsusilə səhər və axşam saatlarında, nəqliyyatın intensiv hərəkət etdiyi zamanlarda bu ərazidə uzun tıxaclar müşahidə olunur. Həm Sumqayıtdan Bakıya doğru, həm də əks istiqamətdə hərəkət edən sürücülər uzun müddət tıxacda qalırlar. Bu da insanların mənzil başına çatmasında vaxt itkisinə səbəb olur.
Mövcud vəziyyətlə bağlı Azərbaycan Avtomobil Yolları Dövlət Agentliyindən Bakıvaxtı.az-ın sorğusuna cavab olaraq bildirilib ki, Saray körpüsündə hər hansı təmir işi aparılmır.
Açıqlamada qəzalı vəziyyətdə olan əvvəlki körpünün əvəzinə yeni körpünün cari ilin mart ayında istifadəyə verildiyi xatırladılıb.
Qeyd olunub ki, hazırda isə körpüyə yanaşma yollarında genişləndirmə işləri görülür:
"Daha dəqiq desək, mövcud 2 hərəkət zolağının 4 hərəkət zolağına genişləndirilməsi üzrə işlər tərtib olunmuş qrafikə uyğun şəkildə və ümumi hərəkətə minimum maneə yaradılmaqla icra olunur".
