Türkiyəli iş adamı Sərvər Bəşirliyə ev söz verib. Sumqayıt24 bu haqda 3 mart tarixində Milli.az-a istinadən xəbər verir.
Ona yeni avtomobil hədiyyə edən Sebahettin Civelek Bakıya gəlib. O, Sərvərin ailəsinin qonağı olub. İş adamı qeyd edib ki, onların yaşadığı həyətdə ikimərtəbəli ev tikiləcək.
"Sərvər Bəşirlinin icazəsi ilə ona yaxın günlərdə ev tikəcəyik. Artıq evin əsası qoyulub. İnşallah, tezliklə tikiləcək yeni evdə Sərvər Bəşirli ilə çay içəcəyik. Bu cür qardaşı olan millətin kürəyi heç vaxt yerə gəlməz. Azərbaycan və Türkiyə hər zaman - acı gündə də, sevincli gündə də bir-birinin yanında olub. Türkiyədə baş verən dəhşətli zəlzələdən sonra Azərbaycan dərhal öz qardaşının yanına qaçdı, o cümlədən Sərvər Bəşirli... Buna görə də ona dəstək olmağı özümə bir qardaş borcu bildim. Allah bir daha Türkiyəyə acı yaşatmasın", - deyə S. Civelek bildirib.
Xatırladaq ki, Ceyranbatan qəsəbə sakini Sərvər Bəşirlinin "VAZ-2107" köhnə avtomobili ilə yardım apararkən çəkilmiş fotoları həm Azərbaycan, həm də Türkiyə mediasında gündəm olmuşdu.
