Sumqayıt Dövlət Universitetində 31 Dekabr - Dünya Azərbaycanlılarının Həmrəyliyi Günü və Yeni il münasibətilə tədbir keçirilib. Bu barədə 27 dekabr tarixində Sumqayıt24 məlumat verir.
Əvvəlcə Həmrəylik Gününə həsr olunmuş videoçarx nümayiş olunub. Tədbiri universitetin Tədrisin təşkili və təlim texnologiyaları üzrə prorektoru dosent Natiq Talıbov açaraq, iştirakçılara rektor professor Elxan Hüseynovun salamlarını və təbriklərini çatdırıb, bu əlamətdar günün əhəmiyyətindən, Dünya Azərbaycanlılarının birlik və həmrəyliyindən söz açıb. Prorektor onu da qeyd edib ki, 2022-ci il həm ölkəmiz, həm də universitetimiz üçün uğurlu illərdən biri olub. Həmçinin il ərzində qarşıya qoyulan bütün məqsədlərə çatılıb.
Tədbir tələbələrimizin ifaları, universitetin “Səma” rəqs qrupunun maraqlı rəqs nömrələri, eləcə də incəsənət nümayəndələrinin təqdim etdikləri geniş konsert proqramı ilə davam edib.
