Sumqayıtda şəhid Ramil Quliyevə həsr olunan “Bir ömür yaşandı nağıllar kimi” adlı tədbir keçirilib. Bu haqda bu gün, 13 aprel tarixində Regional Mədəniyyət İdarəsinə istiadən xəbər veririk.
Məlumata əsasən, tədbir Mərkəzi uşaq kitabxanasında baş tutub. Mərasimdə 1 nömrəli tam orta məktəbin 4e sinif şagirdləri və müəllim kollektivi iştirak ediblər. Tədbirdə çıxış edən şəhidin atası Elşən Quliyev və bacısı Ramilə Baxşıyeva Ramilin döyüşlərdə göstərdiyi şücaətlərdən danışıblar.
Daha sonra tədbir Şəhidlər xiyabanında davam edib. Mərasimdə “Zərdabi Mətbuat Mərkəzi” İctimai Birliyinin idarə heyətinin sədri Rəhim Hüseynzadə iştirak edib. Əməkdar jurnalist “Qələbə şəhidləri” kitabını kitabxanaya hədiyyə edib.
Ramil Quliyev 1991-ci ilin yanvar ayının 4-də anadan olub. 2015-ci ilin iyul ayında hərbi xidmətə gedib. Hərbi xidmətdə olduğu müddətdə Lələtəpə uğrunda gedən döyüşlərdə iştirak edib. Vətən müharibəsinə 29 sentyabr tarixində qatılıb. O, Hadrut uğrunda gedən döyüşlərdə düşmənin snayper gülləsi ilə vurularaq qəhrəmancasına şəhid olub. 12 gün neytral zonada qaldıqdan sonra Ülvi adlı əsgər yoldaşı onu 4 km çiynində daşıyaraq arxa cəbhəyə təhvil verib. Oktyabr ayının 22-si Sumqayıtda şəhidlər xiyabanında dəfn olunub.
Ramil Quliyev ölümündən sonra “Vətən uğrunda” və “Xocavəndin azad olunmasına görə” medalları ilə təltif olunub.
