Sumqayıtda kişi öz sevgilisini döyüb. Sumqayıt24 bu haqda 22 noyabr tarixində Oxu.az-a istinadən xəbər verir.
Cinayət işi üzrə təqsirləndirilən 30 yaşlı Qədir (ad şərtidir) ifadə verib. O bildirib ki, İradə (ad şərtidir) onun qeyri-rəsmi yaşadığı qadındır:
“Biz təxminən 1 ildir tanış olmuşuq, elə həmin müddətdən birlikdə qeyri-rəsmi ər-arvad kimi yaşamışıq. Aramızda tez-tez münaqişələr yaranıb. İradə məndən dəfələrlə polisə şikayət edib. Lakin sonra məni bağışlayıb”.
Təqsirləndirilən şəxsin sözlərinə görə, münaqişənin səbəbi qısqanclıq olub:
“Münaqişə zamanı İradənin hərəkətlərindən əsəbiləşdiyim üçün əl zərbələri ilə onun bədəninin müxtəlif nahiyələrinə vuraraq ona xəsarətlər yetirdim. Lakin İradə barəmdə polisə şikayət etmədi”.
Lakin növbəti gün aralarında yenidən mübahisə yaranıb. İradə ona işsiz qalmasını irad tutub:
“Bu zaman münaqişəmiz dərinləşdi. Əsəbiləşdim və İradənin ayağından vuraraq yerə yıxdım, bədən nahiyələrinə bir neçə zərbə vurdum. İradə məndən şikayət edəcəyini bildirdi. Mən isə evdən getdim”.
Qədir törətdiyi əməldən peşman olduğunu, barışığa cəhd etdiyini və Vətən müharibəsi iştirakçısı olduğunu səbəb gətirərək, məhkəmədən yüngül cəza istəyib.
Zərərçəkmiş İradə ifadəsində, münaqişənin məişət problemlərinə görə yarandığı vurğulayıb:
“Qədirə irad bildirmişəm ki, bütün günü evdə oturur, özünə iş tapsın. Sözlərim onun xoşuna gəlmədi, bunu münaqişəyə çevirdi, bədənimin müxtəlif nahiyələrinə vurdu. Lakin həmin vaxt Qədirdən şikayətçi olmadım”.
Qadın qeyd edib ki, növbəti dəfə sözləri yenə çəp gəlib:
“Buna görə aramızda münaqişə yarandı. Qədir yenə məni döydü. Artıq bu kimi hərəkətlərdən bezdiyim üçün polisə şikayət etmək qərarına gəldim”.
Son olaraq, o, Qədirlə barışmaq istəmədiyini və şikayətçi olduğunu söyləyib.
Sumqayıt Şəhər Məhkəməsinin hökmü ilə Qədir 9 ay müddətinə azadlığın məhdudlaşdırılması cəzasına məhkum edilib. Təqsirləndirilən şəxs Probasiya şöbəsinə məlumat vermədən saat 23:00-dan növbəti gün saat 07:00-dək yaşadığı evi tərk edə, Sumqayıt şəhəri və Abşeron rayonunun hüdudlarından kənara çıxa bilməz. Həmçinin elektron nəzarət vasitəsini gəzdirməli və həmin vasitənin işlək vəziyyətdə saxlanılması üçün ona qulluq etməlidir.
