Sumqayıt Texnologiyalar Parkının nümayəndələri “Təqdimat günü” çərçivəsində tələbələrlə görüş keçirib. Sumqayıt24 bu barədə Sumqayıt Dövlət Universitetinin saytına istinadən xəbər verir.
Burada STP-nin İnsan resursları üzrə meneceri Namiq Nağıyev, aparıcı mütəxəssisləri Tural Şahbazov, Türkan Məmmədova, Şöləxanım Mirzəyeva, mütəxəssis Sevda Həsənova və universitetin müəllim-tələbə heyəti iştirak ediblər.
Mühəndislik fakültəsinin dekanı, dosent Ulduz Ağayev çıxışında bu cür tədbirlərin ali məktəblərin qabaqcıl müəssisələrlə qarşılıqlı əlaqəsi üçün şərait yaratdığını, tələbələrin yüksək texnoloji, innovasiyalı baza fundamental bilik və vərdişlərə yiyələnməyə marağını artırdığını bildirib.
Qeyd olunub ki, STP ilə SDU arasında imzalanmış əməkdaşlıq memorandumuna əsasən, mühəndis ixtisaslarında təhsil alan tələbələr STP MMC-də istehsalat təcrübəsində olurlar. Bu da günün tələbinə uyğun olaraq kadr potensialının formalaşmasına təkan verir.
Sonda “Ölkəmizi necə tanıyırıq?” mövzusunda ümumi dünyagörüşünə aid test keçirilib və yüksək nəticə göstərmiş tələbələr mükafatlandırılıb.
