Xəzər dənizinin Sumqayıt sahilində yoxlamalar aparılıb. Sumqayıt24 bu haqda 23 yanvar tarixində Qida Təhlükəsizliyi Agentliyinə (AQTA) istinadən xəbər verir.
Monitorinqin məqsədi son vaxtlar tez-tez aşkarlanan suiti tələfatının səbəblərini araşdırmaqdır. AQTA, Kənd Təsərrüfatı və Ekologiya və Təbii Sərvətlər nazirlikləri, həmçinin Qida Təhlükəsizliyi İnstitutunun (AQTİ) mütəxəssisləri tərəfindən suiti cəmdəklərinin qalıqlarından nümunələr götürülüb. AQTİ-nin laboratoriyalarında müayinələr aparılıb. Nəticədə heç bir yoluxucu xəstəliyin törədicisinə rast gəlinməyib.
Qeyd edək ki, Rusiyanın müvafiq qurumunun - “Rosprirodnadzor”un yayımladığı məlumata görə, təbii qazların dənizin dibindən suyun səthinə qalxması və hipoksiyanın yaranması nəticəsində burada tənəffüs edən suitilərin tələf olması ehtimal olunur.
Məsələ Dağıstan Respublikasının mütəxəssisləri ilə müzakirə edilib və eyni fikir onlar tərəfindən də səsləndirilib. Moskva Dövlət Universitetinin coğrafiya fakültəsinin tədqiqatçıları da oxşar ehtimal irəli sürməklə suitilərin seysmik aktivlik nəticəsində yaranan metan qazından zəhərlənməsi qənaətinə gəliblər.
Hələlik qonşu ölkənin laboratoriyalarında aparılmış müayinələr nəticəsində tələfatın əsl səbəbi müəyyən edilərək rəsmi şəkildə elan olunmayıb.
