Sumqayıtın ən böyük küçələrindən biri gecələr zülmətə qərq olur.
Sumqayit24.az-a müraciət edən sakinlərin sözlərinə görə, şəhərin əsas nəqliyyat arteriyalarından sayılan Sülh prospektində son bir neçə gündür axşam saatlarında küçə işıqları yanmır. Bu isə həm sürücülər, həm də piyadalar üçün ciddi təhlükə yaradır.
Qaranlıq səbəbindən sürücülər yolu çətinliklə görür, yolu keçən, yolun kənarı ilə hərəkət edən piyadaları son anda sezə bilirlər. Xüsusilə intensiv hərəkətin müşahidə olunduğu prospektdə qəza riski daha da artır.
Sakinlər məsələ ilə bağlı aidiyyəti qurumları dərhal tədbir görməyə və küçə işıqlandırmasının bərpa olunmasına çağırırlar. Onların fikrincə, problem vaxtında aradan qaldırılmasa, xoşagəlməz hadisələrin baş verməsi qaçılmaz ola bilər.
