Sumqayıt sakinlərinin ən çox maraq göstərdiyi məşğuliyyətlərdən biri də quşbazlıqdır. Şəhərin demək olar ki, hər məhəllə və mikrorayonunda "sülh rəmzi" sayılan göyərçinləri saxlayan insanlara rast gəlmək mümkündür.
20 ildən artıq quşbazlıqla məşğul olan bir neçə şəhər sakini ilə söhbətləşərək onların bu maraqlı hobbiləri barədə düşüncələrini öyrəndik.
Quşbazların sözlərinə görə, Sumqayıtda ən çox "Bakı" və "Qara kəkilli İran" cinsindən olan göyərçinlər saxlanılır. Bildirilir ki, "Bakı" göyərçinləri gündə təxminən 10–11 saat havada qala bilir. Bu quşların diqqət çəkən xüsusiyyətlərindən biri də uçuş zamanı "salto" etmələridir. "İran" cinsindən olan göyərçinlər isə nisbətən daha az – təxminən 5–6 saat uçurlar.
Onların qidalanmasına gəlincə, göyərçinlərə əsasən buğda, dənlənmiş qarğıdalı və günəbaxan tumları verilir.
Digər canlılar kimi, göyərçinlər də müxtəlif xəstəliklərə yoluxa bilirlər. Ən təhlükəli xəstəlik "dəliçə" (başgicəllənmə xəstəliyi) hesab olunur. Digər xəstəliklər zamanı isə əksər hallarda quşları müalicə etmək mümkün olur.
Həmsöhbətlərimizdən biri maraqlı bir məqama da toxunub: "Quşbazlar arasında "ağıl qanadı" adlı bir deyim var. Belə ki, göyərçinin qanadında baş tərəfdən sayanda 12–13 lələk olduqda, artıq bala quşu uçurtmaq olar. Bundan əlavə, 7–8 saat uçmuş quşları növbəti 2–3 gün ərzində uçurtmaq məsləhət deyil. Çünki onların fiziki olaraq bərpa olunması üçün müəyyən vaxt tələb olunur".
