Sumqayıt və Saray qəsəbə sakinlərinin paytaxta getmək üçün avtobus tapa bilməmələrinin səbəbləri açıqlanıb. Sumqayıt24 bu barədə XəzərTV-yə istinadən yazır.
Bundan əvvəl xəbər verdiyimiz kimi, bu problem şəhərimizdən Bakıya gedən 501 nömrəli avtobusların ləğv edilməsindən sonra ortaya çıxıb. Hazırda həmin istiqamətlə yalnız 503 nömrəli marşrut xəttinin az sayda avtobusları hərəkət edir. Bu səbəbdən nəqliyyata minməyə yer tapmayan vətəndaşlar taksi ilə getməyə məcbur olurlar.
Dövlət Avtomobil Nəqliyyatı Xidmətinin nümayəndəsi Günay Əliyeva bu məsələ ilə bağlı öz açıqlamasında bildirib ki, hazırda bu istiqamətdə 30 dəqiqə intervalla 15 avtobus hərəkət edir:
“Müraciətlərin çox olması səbəbindən, bir müddət əvvəl sınaq marşrut xətti açılmışdır. Lakin, sərnişin axını az olduğundan həmin marşrut 2 ay sonra fəaliyyətini dayandırdı. Sərnişin axını artarsa, gələcəkdə Saray-Bakı marşrut xəttinin də açılmasına baxıla bilər”,- deyə, Əliyeva əlavə edib.
Həmçinin, 503 nömrəli marşrutun dispeçeri bildirib ki, qanunsuz sərnişin daşıma olduğundan, onlara məxsus avtobuslardan az adam istifadə etməyə başlayıb. Əgər qanunsuz sərnişindaşıma yığışdırılarsa, interval 30 dəqiqədən 10 dəqiqəyə qədər azaldıla bilər.
501 nömrəli marşrutun sahibi Dönməz Məmmədov deyib ki, balanslarında 40 avtobus olsa da, həmin səbəbdən bu ilin əvvəlindən fəaliyyətlərini dayandırıblar. Lakin, onlar buna baxmayaraq yenidən fəaliyyətə başlamaq üçün aidiyyatı qurumlara müraciət ünvanlayıblar.
