Sumqayıtda bulvar ərazisinin abadlaşdırılması ilə bağlı satınalma prosesi ləğv olunub.
Fed.az-ın məlumatına görə, "Sumqayıt Bulvar" MMC tərəfindən elan olunan hər iki tender eyni səbəbə əsasən dayandırılıb. Qanunun 36.1.1-ci maddəsinə görə, satınalmada iştirak etmək üçün zəruri sənədləri təqdim edən və müvafiq lisenziyaya malik olan təchizatçıların sayı üçdən az olduğu halda, müsabiqə hüquqi cəhətdən davam etdirilə bilməz.
Ləğv edilən ilk tender bulvardakı fontanların, su anbarlarının və çiləyici sistemlərin təmiri və bərpası ilə bağlı idi. Bu işlərin həyata keçirilməsi üçün nəzərdə tutulan ehtimal olunan qiymət 28.312,10 AZN təşkil edirdi. Müsabiqə 18 iyun 2025-ci il tarixində elan olunub, təkliflərin qəbulu isə 11 iyulda başa çatıb.
İkinci ləğv olunan satınalma isə bulvar ərazisində işıqlandırma sisteminin təmirini əhatə edirdi. Bu istiqamətdə ehtimal olunan xərclər 85.547,17 AZN səviyyəsində qiymətləndirilib. Hər iki tenderin açılış və təqdim olunma tarixləri eyni vaxtda – 11 iyul saat 15:00-da planlaşdırılmışdı.
Bununla da, Sumqayıt Bulvarında nəzərdə tutulan mühüm abadlıq və texniki yenilənmə işləri – su infrastrukturu və işıqlandırma sisteminin bərpası – təxirə salınıb. Yeni tenderlərin elan edilib-edilməyəcəyi barədə hələlik məlumat yoxdur.
