Sumqayıt Dövlət Universitetində (SDU) 20 Yanvar faciəsinin 32-ci ildönümünə həsr olunmuş tədbir keçirilib. Bu haqda SDU məlumat yayıb.
SDU-nun rəhbərliyi və tələbə heyəti, şəhid ailələrinin üzvləri universitetin həyətində şəhid tələbə-məzunların xatirələrinə yaradılmış abidəni ziyarət edib və abidə önünə gül dəstələri düzüblər. Tədbir iştirakçıları 20 Yanvar faciəsinə həsr edilmiş kitab sərgisi ilə tanış olublar. Akt zalında davam edən tədbirdə hadisələri özündə əks etdirən sənədli film nümayiş olunub.
Tədbirdə çıxış edən universitetin rektoru Elxan Hüseynov 20 Yanvar faciəsinin başvermə səbəbləri, bu qanlı hadisənin tariximizdə buraxdığı izlər və nəticələri barədə danışıb. Sonra tələbələrin ifasında vətənpərvərlik ruhunda “Qanlı Yanvar hadisələri”nə həsr olunmuş şeirlər səsləndirilib.
Sonda rektor Hüseynov şəhid ailələrini qəbul edib.
