Sumqayıt Dövlət Universiteti Elmi Şurasının cari tədris ilində yekun iclası keçirilib. Sumqayıt24 bu haqda 7 iyul tarixində Sdu.edu.az-a istinadən xəbər verir.
SDU-nun rektoru professor Elxan Hüseynov 2021-2022-ci tədris ilində əldə olunmuş uğurlardan və qarşıda duran vəzifələrdən bəhs edib. Daha sonra yaz semestrinin imtahan sessiyasının yekunları, ayrı-ayrı fakültələrin müvəffəqiyyət göstəriciləri və digər statistik göstəricilər diqqətə çatdırılıb.
Beynəlxalq əlaqələr üzrə prorektor, dosent Qafar Atayev, öz növbəsində, SDU-nun nümayəndə heyətinin Ufa Dövlət Neft Texniki Universitetinə ezamiyyətinin nəticələri haqqında ətraflı məlumat verib. O, bildirib ki, nümayəndə heyəti burada keçirilən “Qaz-Neft-Texnologiyalar” 30-cu Yubiley Sərgi Forumunda iştirak edərək digər ölkələrin universitetlərindən (Qazaxıstan, Tatarıstan və s.) gələn nümayəndə heyətləri ilə əlaqələr qurub və Ufada yaşayan soydaşlarımıza məlumatlandırma sessiyası keçirib, əcnəbi vətəndaşların SDU-ya qəbul qaydaları ilə tanış edib.
Sonda, biznesin təşkili və menecment kafedrasının dosenti Təranə Əhmədovaya, İqtisadiyyat kafedrasının dosenti Lalə Vəliyevaya, Azərbaycan dili və onun tədrisi metodikası kafedrasının müdiri Böyükxanım Eminliyə, həmin kafedranın dosenti Günel Paşayevaya elmi-pedaqoji fəaliyyətə görə dosent elmi adının verilməsinə dair AAK qarşısında vəsatət qaldırılması qərarı alınıb.
