Sumqayıt Dövlət Universitetinin (SDU) 60 illik yubileyi təntənə ilə qeyd edilib. Bu haqda 19 noyabr tarixində Sumqayıt24 xəbər verir.
Sumqayıt Dövlət Dram Teatrında baş tutan tədbirdə Elm və Təhsil naziri Emin Əmrullayev, İcra Hakimiyyətinin başçısı Zakir Fərəcov, Milli Məclisin deputatları, ali məktəb rektorları, ictimai-siyasi xadimlər və universitetin professor-müəllim heyəti iştirak ediblər.
Foyedə SDU-nun müxtəlif dövrlərdə fəaliyyətini əks etdirən fotosərgiyə baxış keçirilib. Çıxış edən rektor professor Elxan Hüseynov iştirakçılara təşəkkürünü ifadə edib. Təhsil ocağının tarixi inkişaf yolundan, beynəlxalq əlaqələrindən, nailiyyətlərindən və qarşıda duran vəzifələrdən danışıb.
Sonra Prezident İlham Əliyevin yubiley münasibətilə və təhsilin inkişafında xidmətlərinə görə sərəncamları, Elm və Təhsil Nazirliyinin “Azərbaycan Respublikasının qabaqcıl təhsil işçisi” döş nişanı və Fəxri Fərmana layiq görülmüş SDU əməkdaşlarının siyahısı oxunub.
Mərasimdə iştirak edən Naxçıvan Muxtar Respublikasının təhsil naziri Rəhman Məmmədov, Rusiya Federasiyasının Ufa Dövlət Neft Texniki Universitetinin rektoru dosent Oleq Baulin və Çinin Heksi Universitetinin ölkəmizdəki rəsmi nümayəndəsi Sonq Quanqxiao SDU-nun əhəmiyyətindən və nailiyyətlərindən danışıblar.
Sumqayıtın icra başçısı Zakir Fərəcov və Türkiyə Cümhuriyyətinin Hacəttəpə Universitetinin professoru, Sumqayıt Dövlət Universitetinin Fəxri doktoru Şükrü Haluk Akalın öz hədiyyələrini rektor Elxan Hüseynova təqdim ediblər.
Yubiley mərasiminin sonunda universitetin marşı səsləndirilib.
