Sumqayıt Dövlət Universitetinin (SDU) 60 illik yubileyi Bakı Dövlət Universitetində (BDU) qeyd edilib. Bu barədə 12 noyabr tarixində Sumqayıt24 xəbər verir.
Tədbirdə BDU-nun rektoru Elçin Babayev, professor-müəllim və tələbə heyəti, SDU-nun rektoru professor Elxan Hüseynov və rəhbərlik etdiyi nümayəndə heyəti iştirak ediblər.
Dəyirmi masa ətrafında keçirilən toplantıdan sonra tədbir Heydər Əliyev Muzeyində davam edib. Rektor Elçin Babayev öz çıxışında qeyd edib ki, təhsilin inkişafında SDU-nun özünəməxsus yeri var. Bu təhsil müəssisəsinin yaradılması texniki sahələr üzrə kadrların hazırlanması prosesinə, ekoloji problemləri olan şəhərin sağlam bir zonaya çevrilməsinə, elm, təhsil və mədəniyyətin təkmilləşməsinə təkan verib. İki universitet arasında müxtəlif sahələrdə uğurlu əməkdaşlıq əlaqələri mövcuddur.
Rektor Elxan Hüseynov özünün də Bakı Dövlət Universitetinin məzunu olduğunu xatırladıb. O bildirib ki, bu təhsil ocağı onun karyerasının inkişafında mühüm rol oynayıb.
Sonra Sumqayıt Dövlət Universitetinin fəaliyyətindən və uğurlarından bəhs edən videoçarx nümayiş olunub. Bakı Dövlət Universitetinin rəhbərliyi adından SDU-ya xatirə hədiyyəsi verilib.
