Bir müddət əvvəl Sumqayit24.az olaraq yazmışdıq ki, paytaxt Bakının mərkəzində – Nizami küçəsi ("Torqovıy") ərazisində hər il olduğu kimi Novruz münasibətilə bayram yarmarkası təşkil olunur və minlərlə insanın üz tutduğu bu məkan şəhərdə əsl bayram ab-havası yaradır. Həmin vaxt Sumqayıt sakinləri də sual edirdi: bəs bizim şəhərdə niyə belə bir yarmarka yoxdur?
Görünür, bu sual cavabsız qalmayıb.
Artıq Sumqayıtın mərkəzində – Kimyaçı Mədəniyyət Sarayı qarşısında "Kənddən Şəhərə" yarmarkası təşkil olunub. Yarmarkada əsasən bölgələrdən gətirilən kənd təsərrüfatı məhsulları – meyvə, tərəvəz, bal və digər məhsullar satışa çıxarılıb. Şəhər sakinləri üçün bu təşəbbüs əlbəttə ki, müsbət qarşılanır.
Amma məsələ təkcə ticarətlə bitmir.
Sumqayıt gənclərinin və şəhər sakinlərinin bir qismi deyir ki, onların gözlədiyi daha fərqli idi. Çünki Bakıda keçirilən "Torpaq əlimdə, bahar ürəyimdə" kimi Novruz yarmarkaları təkcə alış-veriş məkanı deyil – orada müxtəlif əyləncələr, fotoguşələr, dekorativ Novruz kompozisiyaları və müxtəlif festivallar da təşkil olunur.
Bu isə bayramı sadəcə bazara yox, əsl şəhər festivalına çevirir.
Sumqayıtlı gənclər hesab edir ki, ölkənin ən böyük və ən gənc şəhərlərindən biri olan Sumqayıtda da belə tədbirlər üçün bütün imkanlar var. Onların fikrincə, Novruz kimi milli bayramda şəhərin mərkəzində musiqi, dekorasiya, əyləncə və festival ab-havası yaradan böyük bir bayram yarmarkası təşkil etmək mümkündür.
Beləliklə, Sumqayıtda yarmarka artıq var.
Amma görünür, şəhər sakinlərinin gözlədiyi yalnız meyvə-tərəvəz satılan bazar deyil, bayramın özüdür.
