2015-ci ildən 2025-ci ilin I yarımilliyi daxil olmaqla Sumqayıt Kimya Sənaye Parkının rezidentləri ümumilikdə təxminən 14,4 milyard manatlıq məhsul satıb.
Sumqayit24.az xəbər verir ki, bu barədə İqtisadiyyat Nazirliyi məlumat yayıb.
Məlumata görə, bunun da 5,2 milyard manata yaxın hissəsi ixracın payına düşür.
Təkcə bu ilin I yarısında Parkda 1,1 milyard manatdan çox satış olub ki, bunun da 545 milyon manata yaxın hissəsi ixrac edilib. Ötən ilin eyni dövrü ilə müqayisədə ixrac təqribən 20 %-ə yaxın artıb.
Son dövrlərdə kimya sənayesi məhsullarının istehsalında mühüm artım müşahidə olunur. Bu ilin yanvar-iyul aylarında Azərbaycanın kimya sənayesində istehsalın ümumu dəyəri 1 il əvvələ nisbətən 10,7 % artaraq 955 milyon manatı ötüb. Bu artımda Sumqayıt Kimya Sənaye Parkının xüsusi çəkisi var.
Parkın rezidentlərinə indiyə qədər 900-dən çox təsdiqedici sənəd verilib ki, bunun nəticəsində rezidentlər texnika və texnoloji avadanlıqların idxalı zamanı 400 milyon manatdan çox vəsaitlərinə qənaət ediblər.
Parkda investisiya portfeli 6 milyard manatdan çox olan 39 sahibkarlıq subyektinə rezidentlik statusu verilib, bunun 28-i fəaliyyət göstərir. Sahibkarlar tərəfindən görülən işlərə indiyədək 5,5 milyard manatdan çox investisiya yatırılıb, 6 300-dən artıq daimi iş yeri yaradılıb.
Parkda istehsal edilən tikinti kimyəvilərinin, polad və polimer boruların, sürtkü yağlarının, polimerlərin, karbamidin, müxtəlif çeşiddə kabellərin, şüşə lövhələrin, keramik plitələrin və s. məhsulların ixracı istiqamətində də əhəmiyyətli uğurlar əldə edilib. Bu növ məhsullar dünyanın 70-dən artıq ölkəsinə "Made in Azerbaijan" brendi ilə ixrac olunub.
