Qəsdən sağlamlığa az ağır zərər vurmada təqsirləndirilən Valeh Məmmədovun (şərti) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.аz-ın məlumatına görə, Sumqayıt Apellyasiya Məhkəməsində
hakim Rəşadət Ağayevin sədrliyi ilə keçirilən prosesdə qərar elan olunub.
Qərara əsasən, şikayət təmin edilməyib.
İttihama görə, hadisə 2023-cü il sentyabrın 24-ü, saat 18 radələrində Qubada qeydə alınıb.
Belə ki, Valeh Məmmədov zərərçəkmiş Hüseyn Hüseynovu (şərti) qardaşının toy məclisinə qonaq qismində dəvət edib. Toy məclisi zamanı zərərçəkmiş nalayiq ifadələr işlədib. Sonra Valeh qonağı məclisdən çıxarıb həmin kənddə bağ sahəsinin yanına aparıb. Hər ikisi söhbət edərkən təqsirləndirilən şəxs Hüseynin sifət nahiyəsinə qəsdən yumruqla vuraraq, onun burnunu sındırıb.
Hadisədən sonra Valeh Məmmədov saxlanılaraq cinayət məsuliyyətinə cəlb edilib.
Quba Rayon Məhkəməsinin hökmü ilə ona 1 il 6 ay müddətinə azadlığın məhdudlaşdırılması (elektron qolbaq) növündə cəza təyin olunub. Hökmdən narazı qalan zərərçəkmiş şəxs apellyasiya şikayəti verərək, hökmün ləğv edilməsini və təqsirləndirilən şəxsə azadlıqdan məhrumetmə ilə əlaqədar cəzanın təyin olunmasını istəyib, lakin şikayət təmin edilməyib.
