Sumqayıt Apellyasiya Məhkəməsində qətl, quldurluq, və digər cinayətlər törətməkdə təqsirləndirilən Fərman Dəmirovun barəsindəki hökmdən verilən apellyasiya şikayəti üzrə məhkəmə iclası başa çatıb.
Sumqayit24.az xəbər verir ki, hakim Ruhiyyə Əsgərovanın keçirdiyi prosesdə qərar elan olunub.
Qərara əsasən, apellyasiya şikayəti təmin edilməyib.
İttihama görə, Xaçmaz şəhər sakini Şirinbalayeva Mafizə Gülmalı qızının meyiti şəhərin Asif Cəbrayılov küçəsindəki fərdi yaşayış evlərinin birində tapılıb.
Meyit müayinə olunmaq üçün Səhiyyə Nazirliyinin Məhkəmə – Tibbi Ekspertiza və Patoloji Anatomiya Birliyinin Xaçmaz rayon Şöbəsinə təhvil verilib. İlkin araşdırmalarla onun qətlə yetirildiyi müəyyən olunub. İş üzrə şübhəli şəxs qismində başqa şəxs saxlanılsa da, hadisəni törədən şəxs 6 ay sonra saxlanılıb. Məlum olub ki, qətl hadisəsini mərhumun evinin yaxınlığında tikintidə fəhlə işləyən Dəmirov Fərman Seyfulla oğlu törədib. O istintaqa təhvil verilib.
Sumqayıt Ağır Cinayətlər Məhkəməsinin hökmü ilə Fərman Dəmirov 19 il müddətinə azadlıqdan məhrum edilib.
