Sumqayıt məktəblərinin birində pul yığılması ilə bağlı iddialar yayılıb. Sumqayıt24 bu haqda 6 iyul tarixində Xeberle.com-a istinadən xəbər verir.
İddialara əsasən, İsmət Qayıbov adına 1 nömrəli orta məktəbdə 9-11-ci siniflərdən attestat və təmir üçün ümumilikdə 20 manat məbləğində pul yığılır.
Məktəbin direktoru Kəmalə Hüseynova açıqlamasında iddiaları təkzib edib: "Ola bilər ki, dərslərdə iştirak etməyən, 9-cu sinfə qədər güzəştli qiymətlərlə gələn şagirdlərin valideynləri belə danışsınlar. Çünki biz həmin şagirdlərin valideynləri ilə dəfələrlə danışıqlar aparmışıq və bildirmişik ki, sizin övladlarınız oxumur, dərslərdə iştrak etmirsə, peşə məktəblərinə yönəldin sənət öyrənsinlər. Amma bəziləri bizim dediklərimizi anlamaq istəmir, israrla övladlarının 10-11-ci siniflərdə oxumalı olduğunu bildirirlər. Məhz həmin valideynlər heç bir əsası olmayan məlumatlar yayırlar.
O, təmirlə bağlı pul yığılması iddialarını isə absurd adlandırıb: "Yeni tikilmiş məktəbdə nə üçün təmir pulu yığılmalıdır ki? Şər danışanda uyğun danışsınlar ki, inandırıcı olsun”.
