Sumqayıt Regional Mədəniyyət İdarəsinin (SRMİ) əməkdaşları şəhid Müşfiq Bəktiyevin ailəsini ziyarət ediblər. Bu haqda bu gün, 19 yanvar tarixində AZƏRTAC məlumat yayıb.
Bu dəfə SRMİ-nin tabeliyində olan Nizami Gəncəvi adına Kitabxana Klubunun əməkdaşları Corat qəsəbəsində yaşayan şəhid Bəktiyevin ailəsinə baş çəkiblər və qayğıları ilə maraqlanıblar.
Şəhid Müşfiq Bəktiyev 24 yanvar 2002-ci ildə Sumqayıt şəhər Corat qəsəbəsində anadan olub. O, 2008-ci ildə Corat qəsəbəsində 7 nömrəli tam orta məktəbdə təhsilə başlayıb. Sonra təhsilini 10 saylı peşə liseyində elektrik qaz qaynaqçısı olaraq davam etdirib. Lakin təhsilini yarımçıq qoyub.
Vətən müharibəsi başladıqda döyüşlərə qatılıb və Füzuli, Cəbrayıl uğrunda gedən savaşlarda iştirak edib. 20 oktyabr 2020-ci ildə Xocavənd istiqamətində gedən döyüşlərdə şəhidlik zirvəsinə yüksəlib.
Bəktiyev ölümündən sonra “Vətən uğrunda”, “Xocavəndin, Füzulinin və Cəbrayılın azad olunmasına görə” medalları ilə təltif olunub.
