Sumqayıtda müxtəlif sərgi və festivalların təşkil olunması sevindirici haldır. Sumqayıt24 sakinlərdən həmin şənliklərlə bağlı olan fikirlərini öyrənib.
Belə ki, uşaq və böyüklərin vaxtlarını səmərəli keçirmələri üçün son bir ay ərzində şəhərimizdə 5 bələ tədbir keçirilib:
- İlk olaraq Poeziya evinin önündə təşkil olunan “Sum-art” adlı festivaldan başlayaq. Burada vətəndaşların əl işlərindən ibarət rəsm əsərləri, müxtəlif toxunma oyuncaqlar, dekorativ şamlar və s. satışa çıxarılıb;
- Daha sonra “Kimyaçı” Mədəniyyət Sarayında baş tutan “Əmək” yarmarkasından bəhs edək. Bura gələn vətəndaşlara 43 müəssisə əsasən xidmət, istehsal, tikinti və s. sahələrdə 400-dən çox vakansiya təqdim edib;
- İndi isə “KOB Fest” sərgi-satış yarmarkasından söz açaq. Nəsimi parkında keçirilən tədbirdə milli geyimlər və suvenirlər, müxtəlif əl işləri, toxunma oyuncaqlar, xalçalar nümayiş etdirilib;
- Göyərçin parkının aşağı hissəsində təşkil edilən “Peşələr” festivalında 10 peşə üzrə mütəxəssis çıxış edib, vətəndaşları təcrübə proqramlarına qatılmağa çağırıb;
- Son olaraq isə “Kimyaçı” Mədəniyyət Sarayının önündə satış üçün sərgilənən 100 mindən çox kitabdan danışaq. Burada 30-dan artıq nəşriyyat və 10-dan çox Kitab evi iştirak ediblər.
Bu cür əyləncəli, eyni zamanda faydalı tədbirlər insanlar tərəfindən maraqla qarşılanır. Onların sözlərinə görə, uşaqdan tutmuş yaşlısınadək hər kəs həmin festivalların şəhərimizə gəlməsini səbirsizliklə gözləyir.
“Burada əl qabiliyyətinə güvənən şəxslər üçün böyük fürsətlər var. Onlar düzəltdikləri əşyanı sata bilər. Alıcılara gəldikdə isə, qeyri-adi hədiyyə axtaranlar bu yarmarkalara gəlsin. Ürəkləri istəyən hər şeyi tapa bilərlər”, - sakinlərdən biri söyləyib. [modula id="16880"]
