Sumqayıt sakinlərini Qurban bayramında təhlükəsiz ət və ət məhsulları ilə təmin etmək üçün tədbirlər görülür. Sumqayıt24 bu haqda 15 iyun tarixində Qİda Təhlükəsizliyi Agentliyinə istinadən xəbər verir.
Beləliklə, agentlik bu sahədə çalışan şəxsləri dini ayinlərlə yanaşı, heyvan kəsimini və satışını müvafiq qanunvericiliyin tələblərinə uyğun həyata keçirməyə çağırıb. Bildirilib ki, sözügedən proses dövlət orqanlarının müəyyən etdiyi yerlərdə həyata keçirilməlidir. Sanitariya-gigiyena tələblərinə uyğun olmayan küçə, yol kənarı, məhəllə və digər ictimai yerlərdə heyvan kəsimi və satışı yolverilməzdir. Həmçinin, baytarlıq şəhadətnaməsi olmadan iri və xırdabuynuzlu heyvanların daşınmasına da icazə yoxdur.
Satış şəbəkələrinə ünvanlanan müraciətdə qeyd olunub ki, müvafiq infrastruktura malik satış məntəqələri əhalinin təhlükəsiz qurbanlıq heyvan cəmdəyi ilə təmin olunmasında iştirak edə bilər. Bunun üçün Sumqayıtda, Abşeron və Qobustan rayonlarındakı həmin subyektlər əvvəlcədən Agentliyin Sumqayıt regional bölməsinə müraciət etməlidirlər.
Müraciət edən satış məntəqələrinin aşağıda göstərilənləri nəzərə almaları zəruridir:
Sifarişi götürülən heyvanların kəsimi yalnız qeydiyyatdan keçmiş kəsim məntəqələrində həyata keçirilməlidir. Bu satış şəbəkələrində diri heyvanların satışı və kəsiminin həyata keçirilməsi qətiyyən yolverilməzdir. Mövcud soyuducu kameraların imkanlarından artıq sifarişlər qəbul olunmamalı, eyni zamanda soyuq qida zəncirinin tələblərinə əməl edilməlidir.
Xatırladaq ki, Qurban bayramı 9-10 iyul tarixlərində qeyd olunacaq.
